काठमाण्डुबाट खोटाङ गएका २० वर्षका युवकमा कोरोना देखिएको हो । यो सँगै नेपालमा कोरोना संक्रमितको संख्या ३ सय ५९ पुगेको छ । संक्रमित युवक काठमाण्डुको एक फाइनान्समा पैसा उठाउने काम गर्थे । खोटाङको हलेसी तुवाचुङ नगरपालिका-७ निवासी ती युवक गत १२ वैशाखमा काठमाण्डुबाट बस चढेर घर गएका थिए । नगरपालिकाले लकडाउनका कारण काठमाण्डुमा अलपत्र परेका नगरबासीलाई उद्दार गर्ने क्रममा संक्रमित युवक पनि अरु मानिससँगै गाउँ फर्केको खुलेको छ । युवकको धरानस्थित बिपी कोइराला स्वास्थ्य विज्ञान प्रतिष्ठानमा नमुना परीक्षण गर्दा संक्रमण पुष्टि भएको हो । उनलाई मंगलबार विराटनगरस्थित कोशी अस्पताल लैजाने बताइएको छ ।
